كتاب السحر الأحمر الجزء الثاني - أحلى وأجمل قصص الرعب

كتاب السحر الأحمر الجزء الثاني

المارد الأحمر

كتاب السحر الأحمر الجزء الثاني

الفصل الثاني

مي مهتمتش للكلام خدت الكتاب وحطته مكان ما لاقيته ، كانت مازالت جدتها نايمة ، استغربت جدا ازاي جدتي نايمة لحد دلوقتى ومحستش بيا وحتى متقلبتش ..

مي : نينا انتى نايمة لحد دلوقتى .. اصحي بقى بقينا المغرب .. نينا نينا

جدت مي ماتت ، من وهل الصدمة مي منطقتش لحد يوم العزا ، بتبص على السرير تلاقي الكتاب موجود مكانه ، بتقول في سرها ياترا انا السبب في موت جدتي ولا الكتاب ولا المارد الاحمر ,,

عدى اسبوع من يوم وفاة جدت مي ، مي رجعت المدرسة قعدو صحابها يواسوها على فقدان جدتها وهي في عالم تانى سرحانة في الكتاب والكلمتين اللى قرتهم في الكتاب .

راحت مي عشان تشوف عادل وتقوله اللى حصل ، بسبب وفاة جدتها ماشافتهوش خالص ولا حكتله ..

عادل : مي عاملة ايه ؟ معلش انتى عارفه كان نفسي ابقى جمبك بس الظروف ..

مي : ولا يهمك يا عادل ، مش ده المهم ، خدت اقرا ده ..

عادل  : ايه ده ...

مي : اقرا ...

اتعامل معي بحظر فانا اذا حضرت لم اخرج من حياتك ابدا الا بالموت

المارد الاحمر

عادل وشه احمر من الكلام ، خاف واتبرجل قالها : ايه الهبل ده احمر ايه واخضر ايه

مي : المشكلة انى بعد ماخدت الكتاب اللى ظهر لي فجأة وصورته في خمس دقايق بعد ما رجعته لاقيت جدتي ماتت .

عادل وهو مخضوض : وايه علاقة ده بده ، دي اوهام في دماغك ، وده كلام بيكتبوه الكتاب عشان يلفتوا الانتباه

مي : ده كتاب بقاله سنين كتير بتاع السحر مكنش بيسيب حضن جدتي ، انا استغربت لما لاقيتها سيباه وهي نايمة لما كنت المسه بس واهزر معاها عشان تسيبه كانت تزعق وتبرق بعنيها لدرجة انى كنت بخاف منها جدا ، عمتا انا هبتدي اقرا الكتاب ده اهو بقى معايا على طول .

عادل : انتى مصممة برده على حوار حياة

مي : لاء حياة ايه انا ناوية انى اتعلم واقرا وبعد كدا اشوف حياة او غيرها .... انا هروح البيت وهبقى ابعتلك صور الكتاب تقراه ، سلام ...

دخلت مي البيت ، هادي ضلمة ، كئيب جدا بتبص على اوضة جدتها من بعيد لاقيتها مفتوحة ومنوره ، جريت على اوضتها وقفلت الباب ، وقعدت على سريرها وهي بتترعش ، خبط على باب اوضتها ، اتخضت وراحت لاخر السرير ،

افتحي يا مي انا ماما يا حبيبتي ....

مي : الحمد لله ... قامت فتحت وهي بتتنفس بصعوبة

ام مي : ايه ياحبيبتي مالك وشك اصفر كدا ليه ، اوعى تخافي انا جمبك ، انا عايزاكي تخلى بالك من نفسك ومن اخواتك انتى بقيتي مسئولة عنهم دلوقتي ..

مي مكنتش بتسمع كلام امها ، كانت في دنيا تانية ، عنيها رايحة جاية وهي مبرقة ، حاسة ان في حد بيراقبيها من بعيد وحواليها في كل حتة ...

ام مي : ها يا حبيبتي فهمتيني ..

مي : أه يا ماما ما تقلقيش ..

ام مي : انأ هروح انام عشان شغلى بكرة شغلى قران وانتى نايمة ..

مي : حاااضر .

مي قفلت الباب وراحت ع سريرها فتحت الموبيل عشان تبحت صور الكتاب لعادل .. كل الصور لاقيتها عبارة عن صفحات بيضة مش مكتوب فيها حاجه ... فجأة الباب خبط .. اتخضت وقامت تفتح الباب وهي بتقول في ايه تاني ياماما..

صفحات من كتاب السحر الأسود

ملقتش حد لما فتحت الباب ، بصت على الارض لاقت الكتاب موجود قدامها ، برقت بعنيها ووقعت على الارض وزحفت بجسمها لاخر الاوضة ، تبص للكتاب وهي مش مصدقة ازاى ده هنا مين جابه قدام اوضتي ....

قامت بسرعه وخدت الكتاب من الارض وراحت حطته في اوضة جدتها ، ولما رجعت اوضتها لاقته اقدام اوضتها على الارض ، تيار هوا شديد جدا مش عارفه جه منين فتح صفحات الكتاب على صفحة في نص الكتاب ...

راحت عند الكتاب وشالته من على الارض قالت : شكلك مصمم انى اقراك ...

بصت في الكتاب على الصفحة اللى اتفتحت لوحدها مكتوب فيا ..

هيا لننتقم معا

فضلت اسبوع بتقرا في الكتاب مابتخرجش من البيت ، لحد ما اصحابها قلقوا عليها ، قرروا انهم يروحولها يطمنوا عليها..

خبطات على باب الشقة

مي : مين بيخبط

حياة وصفا ونور : احنا ياهانم افتحي

مي : جيتو في وقتكم ...

سلموا عليها التلاته وهي بتسلم على حياة خدة شعرة من على كتفها ..

حياة : ايه يا مي لما كل ده ، اختفيتي من المدرسة ، احنا عارفين انك مضايقة بس حاولى متقعديش وحدك كتير ...

نور : مالك انتى عاملة كدا ليه بقالك اد ايه مستحمتيش ، متحسسنيش انك زعلانه على ستك اوى كدا انتى عمرك ما شكرتي فيها وكنتى بتخافي منها ؟؟

مي : ابدا انا كويسة بس كنت تعبانة ومرهقة ، انتو عارفين انى انا اللى مسئولة عن البيت من دلوقتى .

نور : ماهو باين جدا حتى الشقة بتبرق من النظافة ههههههه

حياة : بس يانور ماتضايقهاش احنا جايين نساعدك يا مي عشان تعرفي ترجعي تحضري دروسك تاني وترجعي زي الاول واحسن ...

نظرة حقد وفرح من مي ....

مي : اه ياريت واللهي يا حياة انك تساعديني لاحسن انا تعبانة ادخلى المطبخ اغسلى المواعين ...

حياة : حاضر عنية ليكي ..

دخلت حياة المطبخ وصفا اوضة النوم تروقها ونور قعدت في الصالة وكل واحدة بتنضف حاجه في شقة مي ...

دخلت مي ورا حياة في المطبخ ...

مي : شكرا يا حياة اوى مش عارفه من غيرك كنت عملت ايه ...

حياة  : بطلي .. احنا اخوات ، انتى عارفه احنا نعرف بعض من اد ايه ، انا بحبك يا مي زي اختي ، وانا هفضل جمبك مهما حصل ...

مي : طيب هاتي اكمل انا غسيل المواعين فيها سكاكين ممكن تعورك

حياة : لالالا انتى فكراني عبيطة وهتعور انا ست بيت ياماما

وهما بيشدو السكينة من بعض عورت مي حياة بالسكينة في ايدها ....

حياة : ااه عجبك كدا يا مي اديني اتعورت .

مي معلش يا حبيبتي تعالى انا هلفلك ايدك بشاش وقطن ..

وهما ماشين كانت نور بتمسح الصالة وفي جردل ماية في الارض ، مي كعبلت حياة وقعت على الارض بهدلت هدومها ....

مي : مالك يا حياة انتي مفطرتيش ولا ايه تعالى اوضتى غيري هدومك اللى اتبلت دي ..

حياة دخلت مع مي الاوضه وهي مستغربة اللى بيحصلها قلعتها البنطالون اللى اتبل وقالتلها سيبيه انا هغسله وهبعتهولك ....

مع نظرة شريرة من مي بانتصارها في انها تاخد من مي كل حاجه كانت عايزاهها منها الشعر والدم ولبس في ريحتها ...

البنات خلصت بعد ماخلصوا ترويق شقة مي ، ماشين عشان يروحوا بيتهم ...

حياة : مي هستناكي بكرة في المدرسة متتاخريش بقي ....

مي : ان شاء الله هاجي ...

مشيوا وسابوا مي لوحدها هي وافكارها هتعمل اللى بدأته ولا لاء ..

دخلت تنام وقالت بكرة يحلها الف حلال ...

مي نايمة على سريرها كانها بتسارع حد .. عماله تسرخ وتزعق ...

حصيت فجأة وقعت من على السرير وهي عرقانة وعمالة تنهج من الكابوس اللى شافته

حلمت بكل حاجة لازم تعملها في حياة وبالتفاصيل وشافت كمان اللى هيحصلها وبقت مترددة تعمل ده ولا لا..

قامت تكلم نفسها لا مش للدرجة دي انا بغير منها بس مش لدرجة اعملها سحر اجننها واخليها بالمنظر ده ، انا خلاص مش هعمل الكلام ده انا هحرق الكتاب خالص ..

قامت من على السرير بصت على الكتاب لاقته مفتوح وعلى الصفحة اللى تخص العمل اللى عايزة تعمله في حياة، قامت من مكانها وراحت عند كتاب السحر الأحمر، ودخلت على الحمام ورمت الكتاب في البانيو وجابت جاز وملت الكتاب بالجاز وراحت جبت كبريت وولعت فيه ..

وقفت تتفرج على الكتاب وهو بيتحرق لحد ما النار انطفت لوحدها فجأة، برقت أوي مش مصدقة إن النار إنطفت فجأة راحت على الكتاب عشان تشوف جرا في ايه الكتاب زي ما هو ،

مي .. إيه ده الكتاب متحرقش انا مش عارفة إزاي ده ، فجأة البيت اتهز بيها كأنه زلزال الحمام كله بقى لونه أحمر وهي متحركت من مكانة ولا قادرة تصوت..

فجأة لاقت كتابات بتظهر على حيطة الحمام بالدم مكتوب فيه

السحر الأحمر هو كتابات من العقل الباطن اخذتيه من جن سليمان سوف يقوم العمل لا رجعة في الأمر إلا بالدم

مي خرجت من الحمام عمالة تتخبط في حطان البيت كله، وهي بتقول نفس الكلام اللى قرته في الحمام كانها مش هي اللى بتتكلم، وقعت على الأرض وهي في نوبة صرع كانت هتموتها ، لحد ما كل الأصوات ما إختفت فجأة وهي سكتت واغمى عليها...

لما مي فاقت قامت تدور على الكتاب لآقته برده على السرير اللى كانت بتنام عليه جدتها مفتوح على نفس الصفحة اللى قررت تعملها في حياة، بصت للكتاب أوي وقالت من الواضح أننا مش هنخلص من بعض بسهولة ....

لاقت حد بيرد عليها بصوت قوي ....

أنتي إخترتي السحر قومي بإكمال .. عملك بداخلك شر كبير دعينا نخرجه معا

قعدت تتلفت حولين نفسها أنت مين ... مين إللى بيتكلم ... أكيد ده مش حقيقي .. ده ده وهم جوايا أنا اللي عملته ,,, ابعدوا عني ..

ظهر خيال على الحيطة خيال جسم رجل كبير عريض، دماغة كبيرة طالع منها شعر كثيف وكأنه عنده دقن متصلة بشعره إيده كبيرة جدا ماسك بيها كتاب ...

قالها ...

هذا كتابك أنتي ملأتيه بنفسك، إخترتي السحر أنا ملك السحر، سوف أساعدك على إكمال ما بدأته..

مي مش في حالة طبيعية فاتحة بؤها ومبرقة مش مصدقة اللى شايفها، بتتمنى إنها تكون بتحلم

مي.. أكيد ده مش حقيقي ده خيال جريت من الأوضة وخرجت برة شقتها وهي عمالة تقول كلام مش مفهوم لحد ما وقعت في الشارع وأغمى عليها ، خدوها المستشفى وأهلها كانوا جمبها وهي فاتحة عنيها وباصة للسقف، ،،

الأم : خير يا دكتور في ايه البنت حصلها كدا ليه ..

الدكتور : دي صدمة عصبية شديدة ، مجهولة السبب، إحنا إدناها مهدئ بس برده مش عايزة تنام وفاتحة عنيها برغم إن المهدئ ده قوي جدا...

الأم : والعمل يا دكتور نعمل إيه ؟؟

الدكتور: هنستمر في مراقبتها لحد ما نشوف تحسن ..

مي برده باصة في السقف مش قادرة تقف عنيها ... خرج كل اللى في غرفتها .. وسابوها لوحدها

كلمت العفريت اللي طلعلها قالتلته

خلاص أنا هعمل اللى هتقول عليه .. هعمل السحر اللى هيجنن حياة .....

الجزء الأول

الجزء الثالث